Raunasaga og þankahríð húsflugu

 

Flögra um svefnherbergið....kemst ekki út. Ungur strákur sefur vært, dreymir eflaust eitthvað skemmtilegt. Ætli hann verði pirraður ef ég reyni að vekja hann? Ég læt reyna á það.

-Flugan flaug með ógnar hraða og stefni beint á nefbrodd drengsins. Litlu vængirnir sveifluðustu fram og til baka með miklum hraða. Flugan hugsaði með sér að þetta yrði gaman og herti flugið.

Skyndilega kom vindhviða frá svefnherbergisglugganum sem feykti flugunni af ,,sporinu,, og hún lenti á náttborðinu við hlið drengsins. Vönkuð náði hún að velta sér af bakinu - staðráðin í að gera aðra atlögu. Hún hóf sig á loft og flaug upp í loft, til að ná sem mestum hraða.

Allt gekk upp og var hún að nálgast dreginn - á ógnar hraða. Ég skal geta þetta núna! hugsaði flugan og bjó sig undir höggið sem var í vændum. Hún reiknaði hins vegar ekki með því að strákurinn hreyfði sig og um leið geispaði hann.

Flugan sá að hún stefndi í svartholið og gat með engu móti stöðvað sig. Ég mun deyja! hugsaði hún og lokaði augunum. Hún fann heitan andardráttinn koma á móti sér, ekki nægjanlega sterkur til feykja henni af leið.

En inn fór flugan og niður í háls drengsins sem vaknaði með andköfum og hóstaði og hóstaði. Flugan náði að komast aftur upp í munnholið en varð undir endajaxli. Dagar hennar voru taldir.

 

 

Kántrí og rólegheit

Já……Hann Valli sendi mér nokkur kántrílög í morgunn……og djöfull er þægilegt að hlusta á þetta! Núna er ég búinn að sanka að mér fullt af lögum og er núna heima og er að hlusta…

Ég fór ekki í vinnuna í morgunn, gerði heiðarlega tilraun til þess……..snéri við hjá afleggjaranum Þorlákshöfn/Rvk. Fékk nóg af að keyra í þessum snjó. Núna er verið að ryðja vegina. Sé til með þetta um hádegi hvort ég fari.Það er samt ekki beint gaman að festast á einhversstaðar á leiðinni……eða fara útaf…Hef sem betur fer ekki lent í neinum útafkeyrslum – 7 9 13…

En ég hef það annars bara mjög gott í litla kotinu mínu, fékk mér besta kaffibolla í heimi í morgun, froðan þykk og góð, fæ mér sennilega annan á eftir.Hafið góðan dag og passið ykkur þarna úti á vegum landsins og hér er eitt kántrí

lag

Léttir

Ég sit nú á svölunum, sem snúa í suður og slappa af. Þægilegur ylur kemur frá fartölvunni (Mac að sjálfsögðu) og heilsan er betri. Matarboðið gekk ágætlega fyrir það að ég fékk matareitrun, bjóst ekki við því þegar ég borða í Hvíta húsinu, allt getur nú gerst!

Cameron Diaz var að fara, þurfti víst að fara í myndatöku fyrir eitthvað tímarit, tók ekki eftir hvað tímarit það væri - var enn hálf sofandi þegar hún fór. Ég er allur að skríða saman eftir matareitrunina, var víst væg sem betur fer. 

Naomi tók því ekki vel þegar hún var fjarlægð frá húsinu mínu, las um það í einhverjum slúðursnepil í morgunn, hún stakk víst grey manninn með hárspennu í hálsinn. Spennan rauf sem betur fer ekki húðina og hlaut hann aðeins smá skrámu. Maður er víst búinn að lögsækja þessa glyðru. Sjáum hvað kemur út úr því.  Í kjölfar þessara aðgerðar minnar fékk ég sent sms í nótt sem var á þessa leið ,, You BASTARD! I'm going to hunt you down and stab you with my hairclip,, Fúl á móti hvað...

En þar sem ég hef það svona gott í Washington er ég að spá í að koma heim á morgun, þarf aðeins að hitta nokkra kunningja og fara á tvo fundi, annan með forsetaframbjóðandanum Hillary Clinton og svo með Bill Gates. Ég mun líklegast ferðast með almúganum á sagaclass á leiðinni heim.....það verður ágætt, maður þarf nú stundum að komast í samband við raunveruleikan því það eru ekki alltaf einkaþotur sem maður flýgur með um heiminn.

Núna þarf ég samt að fara að hætta, var að fá hringingu, limminn er kominn sem mun flytja mig á nýjan veitingastað sem verið er að opna. Hefði vilja hafa Diaz með en svona er þetta bara. Heyrumst!

Morgundagurinn

Á morgun þarf ég að gera ansi margt.

Nú, first ber að nefna að ég þarf að pakka niður í kvöld einhverjum görmum. Fékk meil frá Hvíta húsinu, er víst boðinn í hátíðarkvöldverð. Á gestalistanum er ekki ómerkar fólk en Bob Dylan, Amy Weinhouse (ef hún kemst sökum vímu) Elton John, mín fyrverandi Lindsey Lohan (einnig ef hún kemst) Oprah Winfrey og loks Nicole Kidman og einhver fýr með henni sem ég þekki ekki neitt og finnst ekki vert að nafngreina að svo stöddu. Ég veit ekki alveg hvað Bush er að hugsa en það kemur allt í ljós á morgun.

Ég mun fljúga með Airforce 1, flugvél forsetans. Um borð bíður mín asíkur jógagúru, Gordon Ramsey kokkur mun elda fyrir mig og svo mun Police sjá um að spila tónlistina. Heyrði aðeins í Sting í morgunn og hann var ekki viss hvort þeir gætu mætt….sjáum hvað setur.

Þegar ég lendi í Washington mun Ferrari bifreið bíða eftir mér með einkabílstjóra, á örugglega eftir að skipa honum í farþegasætið, ég auðvita rata um alla borgina.

Forsteinn bauð mér að gista í einni af svítunum í Hvíta húsinu en ég afþakkaði það þar sem ég á nú þakíbúð á 5th avenue. Er samt ekki viss hvort ég hafi rekið háskípið, kemst að því þegar ég kem heim. Hef ekki gert það upp við mig hvort ég verði í tvær eða þrjár nætur…

Naomi hringdi einnig í mig í dag og spurði hvort ég gæti hitt sig, veit ekki hvernig hún frétti af þessu. Laug að henni að ég hefði ekki tíma til að stoppa í borginni – hún var svo leiðinleg síðast þegar ég hitti hana, þurfti að láta sauma tvö spor í kinnina því hún lamdi mig með háhælaðu skónum sínum þegar ég sagðist ekki vita hvað klukkan væri. Hef ekki tíma fyrir svona frekjudollur. Hinsvegar ætla ég að hitta Cameron Diaz, hún kemur mér alltaf til að hlæja, við erum búin að vera í sambandi síðan í September, leynilegu ástarsambandi. Finnst það ótrúlegt að papparassarnir hafi ekki komist að þessu!

Ég reikna með að vera kominn aftur á klakann ekki seinna en 14. Janúar. Mun eflaust blogga eitthvað frá útlandinu.

8.Undur veraldar

Já, undur veraldar…nú það eru til dæmis píramídinn í Giza, Seifsstyttan á Ólimpíu, risinn á Rohdos, vitinn í Faros, artemismusterið í Efesos , hengigarðarnir í Babýlon og loks grafhýsið í Halikarnassos.

Eflaust er mjög gaman að sjá þessi svokölluðu undur….ef það væri mögulegt! Samkvæmt Wikipedia er aðeins píramídinn mikli í Giza eftir af þessum undrum! En ég ætlaði ekki að vera með neinn fræðslupistil – ónei…Um daginn fór ég að hugsa um þessi undur og datt þá í hug 8. Undur veraldar.

Reyndar er þetta ekki einn áþreifanlegur hlutur í heild sinni en maður getur barið það augum í smærri hlutum og snert, ef maður leggur í það á annað borð. Nú ert þú eflaust orðin/n forvitin/n um hvað ég er að bulla hérna á þessari síðu.

Sko, ég er að tala um fræga fólkið, þetta virkilega heimsfræga þotulið sem fólk tilbiður eins og sinn guð. Sumir ganga svo langt að fara í fegrunaraðgerðir til að líkjast sínum stjörnum! Það að manneskja geti haft svona mikil áhrif á fólk er undravert, mætti þá segja að frægðin gæti verið 8. Undrið? Hvers vegna ekki……? Máttur frægðarinnar er mikill og fólk sem er frægt á auðvelt með að láta gott af sér leiða og líka slæma hluti sem ungir og óharnaðir einstaklingar éta upp. Oprah er gott dæmi um frægan einstakling sem lætur gott af sér leiða t.d. með að opna skóla í afríku. Sjónvarps sálfræðingurinn Dr.Phil hefur eflaust hjálpað mörgum manninum.....

En yfir hverju þarf hlutur að búa til þess að geta flokkast sem eitt af undrum veraldar? Það er nú ekki eins og þeir útdeili þessum titlum eins og íslensku fálkaorðunni.

Nú, first þessi undur veraldar eru flest orðnar að rústum..hvernig væri þá að velja ný 6 undur veraldar?

Dagur í lífi stöðumælavarðar

 

Þessi dagur byrjaði eins og hver annar dagur. Klukkuómyndin gargaði á mig á síma tíma og venjulega eða klukkan 06:00. Mogginn small í rúðuna um hálf 7, gleymi alltaf að kvarta undan blaðberanum. Morgunverður var snæddur eins og vanalega. Ég fór í vinnuna.

Ekki óskaveður en ég lét mig hafa það. Fáir á ferli svona snemma. Ég stalst inn í bakarí og fékk mér nýbakað vínarbrauð og drakk með því lapþunnt kaffi. Nennti ekki að kvarta. Um 9 var traffíkin farin að aukast og fólk tilbúið að taka þá áhættu að hundsa stöðumælana. Þeir munu sjá eftir því, læt ekki svona svindlara sleppa á minni vakt.

Mitt fyrsta fórnarlamb var nýbónuð Range Rover bifreið. Ég sá leggjalanga dúfu stíga létt úr bílnum og hurðin lokaðist mjúklega á eftir henni. Hún starði á stöðumælinn hugsandi - ætti ég? ætti ég ekki? ég slepp örugglega....- Svo hvarf hún inn á snyrtistofu hinum megin við götuna. Vegna skemmtanagildis ákvað ég að bíða eftir að hún kæmi til baka úr yfirhalningu til þess eins að sjá viðbrögð hennar. Sem betur fer beið ég - þvílík öskur hef ég ekki heyrt í langan tíma. Hljóð hennar voru ekki ósvipuð hljóðinu frá tekatli þegar suðan kemur upp.

Um 17:00 fór að rigna all hressilega en hún beit ekki á mig bannsett. Föðurlandið yljaði mér vel. Róbert Weiner heilsaði mér er ég mætti honum á Laugarveginum - sagði mér að hann hefði dottið svo illa í hálku ofar á leiðinni að hann væri sárkvalin. Eftir samtal okkar skottaðist ég inn í 10-11 og keypti saltpoka, þann stærsta sem til var í búðinni. Úr þeim poka sáldraði ég saltinu á hálkubletti. Nokkrir vegfarendur klöppuðu mér á öxlina og þökkuðu mér fyrir, einn vegfarendanna gaukaði að mér piparköku. Til allrar hamingju var ég með g-mjólkurfernu í vasanum.

Fór svo heim úr vinnu klukkan 18:00 ánægður með dagsverkið.

 

Alþingi í hnotskurn!

 

Nauðsynlegt að smella á mynd til að stækka 

,,Má ég stela einum,,?

Alveg frá því að maðurinn heyrði fyrst boðorðin 10 hefur honum verið gert það ljóst að það sé bannað/illa séð að stela. Viðurlögin við slíkum verkanði eru mismunandi eftir löndum og kúltúr – allt frá aflimun yfir í samfélagsþjónustu eða skilorð, sem allir virðast fá nú á dögum – fer auðvita eftir umfangi þjófnaðarinns.

Flestir fara eftir þessu boðorði númer 7 og stela ekki. Eða hvað? Ef fólk spyr ,, má ég stela mér,, t.d einum konfektmola er það þá ekki að stela – þó svo að það hafi fengið leyfi til að taka einn mola – því með því hugarfari teygir sá hin sami sig í molann ljúffenga. Réttast væri auðvita að spurja bara beint, má ég fá einn mola. Hvað er svona erfitt við það? Í staðinn fyrir að laumast eins og köttur í kringum heitan graut.

Þetta er nú samt orðinn fastur partur af hinu daglega máli að nota þetta orðalag en mér finnst þetta samt pínu kjánalegt verð ég nú að segja. Sjálfur hef nú sagt þessa ,,fleygu,, setningu en veit alltaf innst inni hversu fáránlega hún hljómar. Það er bara eðli mannsins að sýna sjáflsbjargarviðleytni og nálgast það sem hann þarf/vill hvort sem það kosti þjónað eða ekki. Hellisbúarnir spurðu alveg örugglega ekki þessara spurningar þegar þeir fóru í helli óvinarinns og hnuppluðu spúsu hellisinns ,,u fyrirgefðu granni – en mætti ég ekki stela frúnni þinni?,, ,, HA? Jújú….skilaðu henni bara aftur heim fyrir kvöldmat!

Flutningar

 

Mæli ekki með að flytja hávaxin pottablóm í stormi!

 

 

ökuskírteini í blíðu og stríðu

 

Verð að segja að mér finnst mjög gaman að sjá þessi eldgömlu hlussustóru ökuskírteini! Flestir hafa breyst svo frá því að vera ,,saklausir,, unglingar. Hárgreiðslurnar eru oft á tíðum svakalegar og stór gleraugu áberandi. Flestir eru frekar pínlegir á myndunum sem leiðir það af sér að þeir eru snöggir að pakka skírteininu niður í veskið, helst í einhvern leynivasa sem enginn getur sér þessa mynd af sér.